സൂസൻ
ഒരു പുഴയാണ്
ഒഴുക്ക്
അവധിയെടുത്തുപോയ
നിശ്ശബ്ദതയുടെ
പുഴ.
ഭൂമിയിലെ
രണ്ടു നിലകളുളള വീട്ടിൽ
തടവിലാകപ്പെട്ട
നനവുകളറ്റുപോകാത്ത
വേനൽ.
സൂസൻ
ഇരുളിലിരുന്ന് മുന കൂർപ്പിച്ച
വിരൽതുമ്പുകൊണ്ട്
കറുത്ത നിറങ്ങളെ കൊണ്ടുമാത്രം
ചിത്രം വരയ്ക്കുന്നുണ്ടാവണം.
തരിശ്ശായ ഗർഭപാത്രത്തിന്റെ
മുടികൊഴിഞ്ഞ പെൺതലയുടെ
കീമോയ്ക്കു വിധേയമാക്കപ്പെട്ട സ്വപ്നങ്ങളുടെ
കലണ്ടറിൽ മാഞ്ഞുപോയ മാസമുറകളുടെ
ഇറുക്കിപിടിത്തത്തിനൊടുവിലൊരു
ഇറക്കത്തിലേക്കിറങ്ങിപ്പോയി
പെയ്ൻകില്ലറുകളുടെ
ഇരുമ്പു കുന്തങ്ങളിൽ കുരുങ്ങിക്കിടന്ന്
ഉറക്കത്തിന്റെയുന്മാദത്തെ
വീണ്ടെടുക്കാൻ ശ്രമിച്ച്
വീണ്ടും വീണ്ടും പരാജയപ്പെട്ടവൾ.
യൗവനത്തിലേ നിലംപറ്റിയ മരങ്ങളുടെ
ചരിത്രസ്ഥലികളിൽ
സൂസനൊരു ജാലകം
ഇരുളിൽനിന്ന് ഇരുളിലേക്ക് തുറന്നുവച്ചു
അതിലൂടെ ജീവിതം
ഞെളുങ്ങിയ പിഞ്ഞാണങ്ങളിൽ
ഒരു നേരത്തെ അന്നം മാത്രം
കമഴ്ത്തി കടത്തി വച്ചു
മക്കൾ മെഴുകുതിരികളുമായി
അവളുടെ
മുറിക്കു മുന്നിലിരുന്നു മുട്ടിവിളിച്ച്
വിലാപം പോലെ
പ്രാർത്ഥനകളവസാനിപ്പിച്ച്
മടങ്ങിപ്പോയി
രോഗതുര ദാമ്പത്യം
ജീവിതത്തിലെ
അടിയന്തിരാവസ്ഥയാണെന്ന
അടിക്കുറിപ്പുള്ള ചിത്രം
സൂസൻ.
കാലുകൾക്കിടയിൽ
മറച്ചു പിടിച്ച്
മരവിച്ചു കിടന്നു…..
ഇപ്പോൾ
പള്ളിമണികൾ
മുഴങ്ങിക്കൊണ്ടേയിരിക്കും.